MARIING itinanggi ng nakausap naming staff ng It’s Showtime na aalisin na sa noontime show ng ABS-CBN ang pambato nilang si Vice Ganda.
“Imposibleng mangyari ‘yan dahil si Vice ang pinaka-star ng show. Kaya nabuo ‘yan dahil sa kanya. Kung aalisin siya, tiyak na isang malaking reformat ang mangyayari,” iritadong paliwanag ng source na nakiusap pa na huwag namin siyang pangalanan.
Aware sila sa kumalat na intriga, pero ipinagdiinan ng staff na hindi raw mangyayari ‘yun.
“If I know, pakulo ‘yan ng kalaban o kung hindi man ng mga taong galit kay Vice dahil sa naging pahayag niya sa isyu ni Pacquiao,” banggit pa ng source.
Diretsahan pang sabi sa amin, hindi nakakaapekto ang naturang isyu sa ratings ng It’s Showtime dahil patuloy pa ring mas tinatangkilik sila ngayon ng televiewers.
Samantala, isa sa mga pararangalan sa 47th Box office Entertainment Awards bilang Phenomenal Stars si Vice Ganda kasama ang kapamilya ring sina Coco Martin, Bea Alonzo at John Lloyd Cruz. (JIMI ESCALA)