Isang 10 taong gulang na lalaki ang nasugatan makaraang saksakin ng fish ball stick ng kanyang kalarong 10-anyos na babae matapos siyang tumangging ibigay dito ang hawak niyang P5, sa Binondo, Maynila, nitong Linggo ng hapon.
Ginagamot ngayon sa Justice Jose Abad Santos Hospital si Norben Daka, out-of-school, residente ng Gate 10 sa Parola Compound, Tondo, makaraang saksakin sa likod ng kalaro niyang babae gamit ang fish ball stick.
Sa report ni Supt. Juan Macapaz, hepe ng Manila Police District (MPD)-Station 11, dakong 1:00 ng hapon nang nangyari ang insidente sa Plaza San Lorenzo Ruiz malapit sa Reina Regente Street sa Binondo.
Naglalaro umano ang dalawa nang makita ng suspek na may hawak na P5 si Daka, kaya tinangka itong agawin ng suspek.
Hindi binitwan ng biktima ang barya kaya kumuha ng fish ball stick ang batang babae at sinaksak ang biktima saka tumakbo palayo. (Mary Ann Santiago)