Maagang inilabas ng pamunuan ng Light Rail Transit Authority (LRTA) ang abiso sa schedule ng operasyon ng LRT Line 2 para sa Holy Week.
Ayon kay LRTA Spokesperson Atty. Hernando Cabrera, ang huling alis ng tren ng LRT 2 sa Santolan Station sa Marso 23 (Miyerkules) ay sa ganap na 8:00 ng gabi, habang 8:30 ng gabi naman ang huling biyahe sa Recto station.
Sa kanyang pahayag sa Twitter, sinabi pa ni Cabrera na walang biyahe o operasyon ang LRT Line 2 sa Marso 24 (Huwebes Santo) hanggang Marso 27 (Easter Sunday) upang bigyang-daan ang Kuwaresma.
Sa nakalipas na mga taon, nagpapatupad din ng kaparehong tigil-biyahe ang LRT Line 1 (Roosevelt-Bacalaran) mula Huwebes Santo hanggang Easter Sunday. Ginagamit ng LRT 1 ang nasabing mga araw sa maintenance work sa mga tren at sa mga istasyon nito.
Ang maagang abiso ng pamunuan ay para bigyang giya ang mga pasahero na humanap ng alternatibong transportasyon patungo sa kanilang destinasyon sa nabanggit na mga petsa. (Bella Gamotea)