Patay ang dalawang hindi nakilalang holdaper na magkaangkas sa motorsiklo matapos makipagbarilan sa awtoridad makaraang maispatan habang hinoholdap ang isang dalaga sa Las Piñas City, kahapon ng madaling araw.
Patay ang dalawang suspek dahil sa tinamong ilang tama ng bala sa iba’t ibang bahagi ng kanilang katawan, ayon sa pulisya.
Halos ma-trauma naman si Mary Jane Delos Reyes, 18, ng Agustine Village, Barangay Moonwalk, Parañaque City matapos holdapin ng dalawang suspek.
Sa ulat na tinanggap ni Las Piñas City Police chief Senior Supt. Jemar Modequillo, dakong 1:30 ng umaga at nag-aabang ng masasakyan si Delos Reyes patungong Evacom nang sumulpot ang dalawang armadong suspek na sakay sa motorsiklo (2004-WJ), sa Tionquiao Street, Bgy. Manuyo 2.
Agad na tinutukan ng baril ng isa sa mga suspek ang dalaga at sapilitang tinangay ang shoulder bag nito na naglalaman ng mga cell phone at P1,190 cash bago tumakas ang dalawa.
Tiyempong nagpapatrulya ang mga pulis sa lugar at hinabol ng mga ito ang mga suspek.
Pinaputukan ng mga holdaper ang mga pulis kaya gumanti ang mga ito ng putok hanggang sa bumulagta sa kalsada ang dalawang suspek.
Narekober mula sa mga suspek ang dalawang .38 caliber revolver at ang bag ng biktima. (Bella Gamotea)