Tiniyak ni Makati City Mayor Romulo “Kid” Peña, Jr. ang pagbibigay ng mas de-kalidad na health care service sa mga residente ng siyudad matapos madiskubre sa nakaraang administrasyon ang nasayang na milyun-milyong piso na dapat inilaan sa pangangailangang medikal ng mga taga-lungsod.
Sa isang pag-aaral, ibinunyag ng leader ng “Bagong Makati” na naglaan ang administrasyon ng dinismis na si Mayor Junjun Binay ng P40 milyon noong 2010 hanggang Marso 2015 para sa health care services ng mga residente sa mga sister city ng Makati.
Isa sa mga unang direktiba ni Peña nang palitan si Binay noong Hulyo ay ang suspensiyon ng kasunduan sa sister cities, at ginawang ibimbin ang komprehensibong audit ng pamahalaang lungsod sa ibang local government units.
Ang Makati ang may pinakamaraming sister city na umaabot sa 670 sa buong bansa. Ang Quezon City, ang pinakamalaki at isa sa pinakamayayamang siyudad sa Pilipinas ay may 19 sister city, habang 10 naman ang sa Davao City.
(Bella Gamotea)