CONCEPCION, Tarlac – Pitong katao ang nasugatan at isinugod sa Sta. Rita Hospital matapos magkarambola ang tatlong tricycle sa Concepcion-La Paz Road sa Sitio Matalusad, Barangay Sto. Rosario, Concepcion, Tarlac.
Kinilala ni PO3 Romulus Ramos ang mga nasugatan na sina Alejandro Tayag, 37, driver ng tricycle (CA-7657); Melody, 11; Aldrin Jay, 8; at Adrian Tayag, 13, pawang taga-Bgy. Bantog, La Paz, Tarlac.
Sa panig ng ikalawang tricycle (ID-5823) ay nasugatan din ang driver na si Baylon Torres, 29, at ang asawa niyang si Liway Torres, 25, ng Bgy. Sta. Monica, Concepcion, Tarlac.
Ang pangatlong tricycle (CB-10521) na sangkot sa karambola ay minamaneho naman ni Benjamin Mallari, 22, binata, ng Bgy. Sta. Monica, Concepcion, Tarlac. (Leandro Alborote)