Patay ang tatlong lalaki habang kritikal ang isa pa makaraan silang pagbabarilin ng kapitbahay dahil lang sa parking space sa loob ng kanilang subdibisyon sa Barangay San Nicolas 1, Bacoor City, Cavite.
Kinilala ang mga nasawi na sina Zenaida Pascua; Enrico Pascua, magkaanak; at Felix Tongco, pawang residente ng Ecotrend Subdivision sa nasabing lugar.
Kritikal sa pagamutan si Teresita Bolves, ng nabanggit ding lugar.
Tumakas naman ang suspek na si Hansel Gallo, nasa hustong gulang, kapitbahay ng mga biktima.
Dakong 2:30 ng hapon nang mangyari ang insidente sa loob ng subdibisyon.
Napag-alaman na lagi umanong pinagtatalunan ng mga sangkot ang parking space sa kanilang lugar, at naulit ang pagtatalo nitong Sabado, na naburyong na ang suspek at pinagbabaril ang kanyang mga kapitbahay gamit ang kanyang .45 caliber pistol.
Duguang bumulagta ang mga biktima habang agad namang tumakas ang suspek.
Sinimulan na kahapon ang pagtugis kay Gallo. (Beth Camia)